2021 оной октябриин хорин юһэндэ Буряадай гүрэнэй Хоца Намсараевай нэрэмжэтэ академическэ драмын театрай ордон соо буряад хэлэнэй габшагай һарада зорюулһан түгэсхэлэй баяр ёһолол үнгэрөө. 

 «Буряад үнэн» хэблэлэй байшан, Доржо Банзаровай нэрэмжэтэ Буряадай гүрэнэй университет, Уласай хүүгэдэй номой сан гэгшэд театрай фойе соо гоё гэгшын үзэсхэлэн үнгэргэһэн, дэлгээһэн байна.

 Манай һургуулиин 75 жэлэйнгээ ойдо зорюулжа дэлгээһэн нюдэ хужарлуулма үзэсхэлэндэ һургуули дүүргэгшэдэй янза бүриин дүрэ зурагуудтай альбомууд, видеоролигууд, һурагшадай ажалнууд ба һургуули дүүргэгшэдэй – Николай Гармаевич Дамдиновай, Солбон Дондупович Ангабаевай бэлэглэһэн бэшэг, буряад хэлэ ба литературын багшанарай номууд гэхэ мэтэ олон зоной һонирхол, анхарал татаһан байна.

 Һургуулиингаа захиргаанай зүгһөө шадамар бэрхээр уран шэмэглэл зохёожо дэлгээһэнэй түлөө Архинчеева Жаргалма Анзановнада, Федорова Оксана Александровнада, Шултунова Вера Раднаевнада, Дашиева Валентина Гавриловнада, Аюшеева Инесса Николаевнада, Пелепягина Маргарита Анатольевнада, Бадмацыренова Цырен-Долгор Бадмаевнада, Буянтуев Зандан Петровичто, Сугробов Владимир Андреевичта, Арьянов Бимбо Цыдыповичта, Прокопьев Лаврентий Борисовичта үнэнхэ зүрхэнһөө халуун баярые хүргэнэбди.

 Газар дэлхэйдэ сэгнэхэ, аршалха юумэмнай гансахан-үндэһэн буряад хэлэмнай. Эхэ хэлэеэ хүндэлжэ, урагшатай урматайл ябыт даа!